Um kl. 5.30 að morgni föstudags átti óvenjulegt rán sér stað í hjálpartækjabúð Adam & Evu á Kleppsvegi.
Tvær ungar stúlkur komu þá aðvífandi á litlum fólksbíl, af gerðinni Hyundai i10, og bökkuðu þrisvar sinnum í gegnum útidyrahurð verslunarinnar. Þegar leiðin var greið stukku ræningjarnir út úr bílnum og hlupu inn í verslunina. Höfðu þær meðal annars á brott með sér kynlífsdúkku sem kostar rúmlega 300 þúsund krónur.
DV birti myndskeið með fréttinni og vakti það mikla athygli. Í því sést hvar bílnum er bakkað þrisvar sinnum inn í útidyrahurð verslunarinnar og í kjölfarið hlaupa ræningjarnir inn í verslunina og koma síðan hlaupandi út með fenginn. Meðal annars rándýra kynlífsdúkku. Á annar ræninginn í talsverðum erfiðleikum með að koma dúkkunni fyrir í aftursæti bifreiðarinnar. Það hefst að lokum og síðan bruna ræningjarnir út í nóttina.
Kynlífsdúkkan sem ber hið virðulega heiti Kittý er metin á um 350 þúsund og er tjónið alls metið á um eina og hálfa milljón.
Lögreglan hefur tekið málið afar alvarlega og verst allra fregna af framgang málsins. Morgunblaðið greinir þó frá því í morgun að tæknideild lögreglu hafi lokið rannsókn á bílnum og þá hafi fingraför verið könnuð.
Jón Karl Þórisson aðstoðaryfirlögregluþjónn lét hafa eftir sér að hann teldi að málið myndi leysast og hann væri bjartsýnn á að lögreglu tækist að góma þjófana.