Þjófagengi var gómað í Byko við Skemmuveg í Kópavogi á þriðjudaginn. Að sögn heimildarmanns DV var starfsmanni ógnað þegar hann stóð einn þjófinn að verki við að taka þjófavörn af skóm.

Heimir Ríkarðsson, lögreglufulltrúi í Kópavogi, segir í samtali við DV að málið sé í rannsókn. „Samkvæmt lýsingu þá var komið að tveimur mönnum sem voru að stela inni í búðinni, voru að taka segul af skóm. Það er talað um að þeir hafi ráðist að þeim og hlaupið svo í burtu. Byko mun svo senda á okkur myndbandsupptökur og málið er í rannsókn,“ segir Heimir.

Sigurður Pálsson hjá Byko segir atburði sem þessa daglegt brauð.

„Þetta var eins og gerist í mörgum verslunum, þjófnaður og hann sýndi ógnandi tilburði. Það var svo sem ekki neitt meira það, ég get ekki séð að þetta sé nokkur frétt. Þetta er eitthvað sem gerist í öllum búðum, alla daga.“

Aðspurður hvort starfsmaður Byko hafi slasast svarar Sigurður neitandi.

„Þarna var þjófnaðargengi, fimm talsins. Starfsmaður hjá okkur kemur að honum og hann sýnir ógnandi tilburði. Þegar slíkt gerist hjá okkur fer ákveðin atburðarás í gang, öryggisstjóri og öryggisverðir mættu og leysa upp stöðuna áður en í óefni fór. Þeim var síðan vísað út.“