Klukkan þrjú í nótt var akstur ökumanns stöðvaður í vesturhluta Reykjavíkur. Ökumaðurinn gaf lögreglumönnum ítrekað upp ranga kennitölu. Á endanum tókst þó að fá rétta kennitölu upp úr honum og kom þá í ljós að hann er sviptur ökuréttindum og var þetta ekki í fyrsta sinn sem hann braut gegn sviptingunni. Hann er einnig grunaður um að hafa verið undir áhrifum fíkniefna.
Á sjötta tímanum í gær var tilkynnt um innbrot í hús í Breiðholti. Þar hafði verið farið inn um glugga og áfengi stolið.
Á fyrsta tímanum í nótt var akstur ökumanns stöðvaður á Reykjanesbraut í Kópavogi. Ökumaðurinn reyndist vera án ökuréttinda og þetta var ekki í fyrsta sinn sem hann er staðinn að akstri þrátt fyrir þetta. Hann er einnig grunaður um hylmingu en meint þýfi fannst í bifreið hans.
Einn ökumaður var handtekinn síðdegis í gær grunaður um akstur undir áhrifum fíkniefna og að aka sviptur ökuréttindum og það ekki í fyrsta sinn.
Tveir ökumenn voru handteknir í Kópavogi í nótt grunaðir um ölvun við akstur. Annar þeirra neitaði að segja til nafns og var skilríkjalaus. Hann var því vistaður í fangageymslu þegar búið var að taka viðeigandi sýni úr honum. Bifreiðin, sem hann ók, reyndist ótryggð og því voru skráningarnúmerin tekin af henni.
