Brynjar Níelsson, þingmaður Sjálfstæðisflokksins gerir lítið úr ræðum stjórnarandstæðinga í þinginu í færslu sem hann skrifar á Facebook í dag. Í færslunni sem vakið hefur töluverða athygli mælir hann með því að fólk hafi þurrkur við hendina ætli það sér að hlusta á ræðurnar á netinu. Brynjar segir þekkt að fólk fái blóðnasir úr leiðindum.
„Hugsa að það hefði verið heldur skárra að sitja í gæsluvarðhaldi í einangrun en að afplána ræður stjórnarandstæðinga í þinginu í gærkvöldi um stefnuræðu forsætisráðherra,“ segir Brynjar og bætir við: „Efast um að nokkur hafi skilið ræður Píratanna, ekki einu sinni þau sjálf.“
Brynjar segir ræðumenn Samfylkingarinnar hafa bætt met. „Ræðumenn Samfylkingarinnar slógu eigið Íslandsmet í lýðskrumi, tvískinnungi og útúrsnúningi. Eins mikið og mér finnst vænt um Flokk fólksins hefði verið gaman að heyra eitthvað nýtt þar. En auðvitað er góð vísa aldrei of oft kveðin,“ segir Brynjar.
