Kjartan Adolfsson var fyrir mánuði dæmdur í fjögurra ára fangelsi fyrir kynferðisbrot gegn dætrum sínum og brot gegn nálgunarbanni. Hann hefur áður verið dæmdur fyrir brot gegn barni sínu en árið 1991 hlaut hann dóm fyrir ítrekuð kynferðisbrot gegn elstu dóttur sinni.
Kjartan er ekki nafngreindur í dómnum en Stundin hefur fjallað ítarlega um málið og hefur rætt við bæði elstu dóttur hans, Guðrúnu Kjartansdóttur, og yngri dóttur, Önnu Kjartansdóttur. Fréttablaðið greindi fyrst frá dómi hans. Kjartan var ákærður fyrir brot gegn tveimur dætrum sínum og brot gegn nálgunarbanni. Hann var þó sýknaður af þremur ákæruliðum af fjórum er vörðuðu eldri dóttur hans. Hann neitaði sök fyrir dómi.
Kjartan var ákærður fyrir að hafa bæði káfað og nauðgað eldri stúlkunni í allt að tíu skipti er hún var á aldrinum fimm til tíu ára. Hann var sýknaður af þeirri ákæru þar sem minni stúlkunnar af brotunum var gloppótt. Hann var auk þess ákærður fyrir að hafa káfað á og nauðgað sömu stúlku þegar hún var tólf ára. Hann var sýknaður af þeim lið þar sem frásögn stúlkunnar var ekki „eindregin eða nákvæm,“ líkt og það er orðað í dómi. Hann var ákærður fyrir hafa strokið rass sömu stúlku þegar hún var 15 ára við störf í frystihúsi. Hann var sýknaður af þeirri ákæru þar sem ásökunin var einungis byggð á frásögn stúlkunnar. Kjartan var einungis dæmdur fyrir eitt brot gegn eldri dótturinni, að hafa látið hana horfa á klám þegar hún var á bilinu 9 til 11 ára og nuddað á henni kynfærin.
Líkt og fyrr segir var Kjartan dæmdur fyrir brot á nálgunarbanni með því að hafa árið 2016 farið í verslunarmiðstöð að hitta eldri dótturina í tvígang þrátt fyrir að honum hafi verið bannað að vera í beinu sambandi við hana. Að lokum var Kjartan dæmdur fyrir að hafa nauðgað yngri dótturinni í fjögur skipti þegar hún var á bilinu sjö til níu ára. Þau brot áttu sér stað á árunum 2009 til 2011.
Í dómi er vitnað í lögregluyfirheyrslu yfir eldri stúlkunni þar sem hún lýsti brotunum. „Hann setti kyn eða þú veist kynfæri hans upp í leggöngið mitt, … þá setur hann typpið í leggöngin og já þangað til að hann fékk fullnægingu, svona var það … oft eða alltaf inn í svefnherbergi þegar allir voru sofandi … þegar hann byrjað að gera þetta þá sagði hann við mig að ekki segja neinum út af því að hann, hann getur lent í vondum málum og já þá man ég það að ég var svo lítil að ég vil ekki missa hann af því að pabbi og mamma skildu … og hann var sá eini sem var með okkur C. … Hann sagði bara fyrirgefðu, ég ætlaði ekki gera þetta, bað mig um að segja ekki frá þessu. …
„Þegar ég var yngri þá leið mér bara, bara eðlileg, ég vissi ekki að þetta væri eitthvað óeðlilegt, en þarna í seinustu skiptunum þegar ég var orðin eldri þá vissi ég að þetta væri ekki eðlilegt og já, en ég þori ekkert að segja frá … ég man ekki hvort ég hafi reynt eitthvað … að vera ekki nálægt honum af því að mamma, stjúpmamma mín, hefur líka verið að beita mig svona ofbeldi og mig leið svona langt um betra að vera með honum af því að mamma var alltaf svona brjáluð í skapinu og vildi ég eiginlega ekki vera með henni,“ segir í dómi.
Kjartan var dæmdur í fjögurra ára fangelsi en til frádráttar er óslitið gæsluvarðhald frá 2. nóvember í fyrra. Honum er jafnframt gert að greiða eldri dótturinni miskabætur upp á eina og hálfa milljón króna og hinni yngri þrjár milljónir. Að lokum er honum gert að greiða helming sakarkostnaðar sem í heild er tæplega átta milljónir.
