Fréttamaðurinn góðkunni, Bogi Ágústsson, minnist þess á Facebook-síðu sinni að fyrir sex árum hafi hann haft meira frelsi en nú til að styðja góð málefni. Þá var hann andlit dagsins í átaki á vegum Kvennaathvarfsins en það væri honum óheimilt í dag þar sem reglur RÚV hafi verið hertar hvað þetta varðar.
„Við höfum hert reglurnar á fréttastofunni svo fréttamenn taka ekki lengur þátt í neins konar herferðum. Fyrir sex árum var mér hins vegar ljúft að að taka þátt í átaki til styrktar Kvennaathvarfinu,“ skrifar Bogi og deilir færslu Samtaka um kvennaathvarf frá árinu 2012.
Það vakti talsverða athygli árið 2016 þegar nýjar siðareglur fréttamanna RÚV tóku gildi og var starfsmönnum þá meinað að taka afstöðu í málefnum opinberlega. „Starfsfólk, sem sinnir umfjöllun um fréttir, fréttatengt efni og dagskrárgerð tekur ekki opinberlega afstöðu í umræðu um pólitísk málefni eða umdeild mál í þjóðfélagsumræðunni, þ. á m. á samfélagsmiðlum,“ segir í siðareglum.
Þetta var gagnrýnt af mörgum, líkt og Vísir greindi frá á sínum tíma, en IMMI, alþjóðleg stofnun um upplýsinga og tjáningarfrelsi, sendi frá sér yfirlýsingu þar sem þetta ákvæði var sagt stangast á við stjórnarskrárbundin ákvæði um tjáningarfrelsi.