Jóhanna Pálsdóttir, kennari í Kópavogi, birti í gærkvöldi mynd af rottu sem spókaði sig um í Kópavogi í gærkvöldi. Jóhanna deildi myndum af rottunni í Facebook-hópnum Kársnesið okkar en myndirnar má sjá hér neðst í fréttinni.
„Ég sat hjá móður minni þegar við sáum hana tölta niður tröppurnar. Barnabarnið mitt hafið verið að leika sér þarna í garðinum rétt áður og mér var mjög brugðið hvað það varðar. Ég var alveg grunlaus um að svona kvikindi gætu komið þangað,“ segir Jóhanna í samtali við DV.
Jóhanna hefur búið á Kársnesinu í nokkra áratugi og kannast ekki við að hafa séð rottur á þessum slóðum. Færsla Jóhönnu vakti sterk viðbrögð meðal íbúa í Kársnesi. „Ein var á rölti um Borgarholtsbraut, langar ekkert út í garð í kvöld,“ sagði einn íbúi í hverfinu. „Sást ein hérna í Skógargerðinu í kvöld,“ bætir annar íbúi við en ekki er ljóst hvort um sömu rottu var að ræða.
Theodóra S. Þorsteinsdóttir, oddviti Bjartrar framtíðar í Kópavogi er merkt í athugasemd við færsluna. í svari segir hún aldrei hafa heyrt um rottur á þessu svæði. „Ég skal kanna hjá bænum hvað þeir segja við þessu,“ bætir Theodóra við.
