„Ég verslaði kolsýrt vatn með ávaxtabragði á þremur stöðum í dag. N1 Ártúnshöfða, 10-11 Vesturlandsveg eða Shell bensínstöðinni og Bónus Árbæ. Ástæðan fyrir því að ég valdi þessa staði eru að þeir eru allir í labbfæri við stærstu gosframleiðendur landsins.“ Þannig hefst frásögn Ragnars Þórs Ingólfssonar formanns VR á Facebook. Hann birtir ljósmynd af kvittun frá Bónus, N1 og 10-11.
Fyrir ávaxtatopp drykk greiddi Ragnar 95 krónur í Bónus. Í N1 kostaði drykkurinn 315 en í 10-11 var hann á heilar 399 krónur. Ragnar segir:
„Nú reikna ég með að Bónus sé með einhverja álagningu og allir þessir risar á markaði með bestu mögulegu viðskiptakjör hjá framleiðendum.“
Viðbrögðin við þessu innleggi Ragnars voru gríðarleg og eru langflestir á því að um okur sé að ræða. Útvarpsmaðurinn Máni Pétursson er ekki á sama máli. Hann segir: Þetta er eðlilegt. Bensínstöðvar eru ekki Bónus. Enda verslar maður vanalega ekki drykki þar. Væri hægt að sleppa þessari þjónustu líka og vera bara með bensín. Olíufélögin geta þá fækkað starfsmönnum í leiðinni. Sé ekki að neinn græði á því.“ Þá tekur verkalýðsforinginn Vilhjálmur Birgisson þátt og segir álagninguna galna. Gunnar Smári Egilsson segir: „Samkvæmt dæminu gæti 10-11 keypt toppinn hjá Bónus og samt verið með 320%.“ Þá spyr Ragnar Þór í innleggi sínu: „Finnst ykkur þetta eðlilegt?“