Jón Valur Jensson, guðfræðingur og bloggari tjáði sig í vikunni um Hinsegin daga og aðkomu Reykjavíkurborgar að hátíðinni. Jón Valur hefur einnig tekið virkan þátt í stjórnmálastarfi fyrir íslensku þjóðfylkinguna. Ekkert varð að því að Íslenska Þjóðfylkingin væri á kjörseðlinum í kosningum til Alþingis árið 2017 því flokkurinn dró framboð sitt til baka eftir að yfirkjörstjórn í suðurvesturkjördæmi sendi meðmælandalista flokksins til lögreglu vegna rannsóknar um skjalafals.

Ummæli Jóns Vals vöktu mikla athygli og skömmu eftir að þau voru skrifuð birti Jón Gnarr myndband þar sem hann las upp ummæli Jóns Vals með sömu rödd og persónan Indriði úr þáttunum fóstbræðrum í myndbandi sem Jón Gnarr birti á Twitter reikningi sínum.

Myndi borga til að heyra @Jon_Gnarr lesa þetta sem Indriði. pic.twitter.com/gYfHoReaSu

— Geir Finnsson (@geirfinns) August 8, 2018

Í kjölfarið af birtingu myndbandsins, sem um 30.000 manns hafa nú horft á, sagði Daníel Arnarsson, formaður samtakanna 78, í samtali við fréttablaðið, að nokkrir hafi styrkt samtökin eftir að myndbandið fór í birtingu. Daníel sagði einnig: „Ég veit ekki hvort hann hefur setið hinsegin fræðslu en við tökum honum fagnandi. Það er okkar hlutverk að fræða, stuðla að þróun og standa fyrir hinsegin baráttu. Jón Valur og fleiri hafa sýnt fram á að enn er nauðsyn á henni.“

DV hafði samband við Jón Val Jensson til að spyrja hann hvort hann myndi þiggja boð Daníels um að mæta í hinsegin fræðslu hjá samtökunum 78.

„Nei takk, nei þakka þér fyrir. Nei, ég hef ekkert álit á þessu,“ sagði Jón Valur og bætti við: „Ég þarf ekkert á þessu að halda frá mönnum sem hafa ekki einu sinni haldið uppi fagmennsku á þessu sviði.“ Þegar Jón Valur var beðinn um nánari útskýringu fyrir að vilja ekki þiggja þetta góða boð svaraði hann þeirri beiðni með því að skella á blaðamann í tvígang.