Donald Trump, forseti Bandaríkjanna, sagði í tísti í dag að Jeff Sessions, dómsmálaráðherra Bandaríkjanna ætti að hætta rannsókn ráðuneytisins, sem sérstakur saksóknari Robert Mueller stýrir, á afskiptum Rússlands af forsetakosningunum sem fóru fram árið 2016 þar í landi. Trump heldur því fram að þessi rannsókn sé meðal annars að skaða hagsmuni Bandaríkjanna. Trump hefur ítrekað haldið því fram að rannsókn á afskiptum Rússlands af kosningunum séu nornaveiðar og það hafi aldrei verið neitt samband á milli hans eða starfsfólks hans á meðan á kosningabaráttu hans stóð yfir.
Í tístinu sínu sagði hann að dómsmálaráðherra ætti að stoppa rannsóknina og er það núna túlkunaratriði lögfræðinga þar í landi hvort þetta flokkist undir að Trump sé að reyna hafa áhrif á rannsókn málsins.
Sarah Huckabee Sanders, blaðafulltrúi Hvíta hússins, sagði rétt í þessu að forsetinn væri ekki að skipa dómsmálaráðherranum að hætta rannsókn sinni á málinu, heldur er þetta eingöngu skoðun hans á málinu og teljist því ekki sem bein skipun. Blaðafulltrúi Hvíta hússins hefur hinsvegar áður sagt að allt það sem Trump skrifi í Twitter færslunum sínum sé stefna Hvíta hússins.
..This is a terrible situation and Attorney General Jeff Sessions should stop this Rigged Witch Hunt right now, before it continues to stain our country any further. Bob Mueller is totally conflicted, and his 17 Angry Democrats that are doing his dirty work are a disgrace to USA!
— Donald J. Trump (@realDonaldTrump) August 1, 2018