Frekar vandræðleg mistök áttu sér stað á opinberum fundi Constantin Toma, borgarstjóra Buzau í Rúmeníu og Paul Brummell sendiherra Bretlands. Meðfylgjandi ljósmynd sem tekin var á fundinum sýnir að fáninn við hlið Brumell er íslenski fáninn, en ekki sá breski.

Myndin birtist á fésbókarsíðu borgarstjórans á dögunum en var fljótlega fjarlægð, af augljósum ástæðum. Færslan var þó nógu lengi inni á vefnum til þess að fjölmargir náðu að taka skjáskot af myndinni.

Fyrir rúmlega tveimur vikum voru sambærileg mistök gerð þegar breski sendiherrann átti fund með borgarstjóra rúmönsku borgarinnar Iasi. Fáninn sem þá var settur á borð hans var 200 ára gömul útgáfa af breska fánanum en þegar glöggt er skoðað má sjá að þar er hvergi að finna tákn írska fánans, sem hefur verið hluti af hinum svokallaða „Union Jack“ síðan árið 1801.