Fíkniefnaleitarhundurinn Sombra, eða Skuggi, á ekki sjö dagana sæla um þessar mundir. Skuggi er einn afkastamesti fíkniefnaleitarhundur Kólumbíu og hefur hann átt sinn þátt í um 250 handtökum á undanförnum árum.
Á dögunum átti hann stóran þátt í því að lögregla lagði hald á tíu tonn af kókaíni sem voru í eigu glæpagengis í Kólumbíu. Umrætt glæpagengi, Urabenos, brást við með því að leggja talsverða fjárhæð til höfuðs Skugga, upphæð sem nemur rúmum sjö milljónum íslenskra króna. Það er því til mikils að vinna fyrir þann sem Skugga fyrir kattarnef.
Í frétt Telegraph kemur fram að lögregla hafi brugðist við þessum hótunum með því að flytja Skugga í öruggara umhverfi á El Dorado-alþjóðaflugvöllinn í Bogota. Þá hafa lögregluþjónar fengið það hlutverk eitt að gæta öryggis hans.
Skuggi er sex ára og af tegundinni German shepherd. Hann hefur verið í liði lögreglunnar síðan hann var hvolpur og er hetja í augum margra Kólumbíumanna. Árangur hans talar sínu máli og er hann stundum sagður vera martröð þeirra sem sjá um að smygla fíkniefnum úr landi.
„Það hversu mikið þeir leggja til höfuðs Skugga sýnir þau áhrif sem hann hefur haft á tekjuafkomu samtakanna,“ segir ónafngreindur lögreglumaður í samtali við Telegraph.