Þann 26. júlí síðastliðinn lenti flugvél Circle Air á Siglufjarðarflugvelli, sú fyrsta síðan í lok sumars árið 2014, en þá var flugbrautinni lokað.
Flugbrautin á Siglufirði hefur nú verið skráð að nýju sem lendingarstaður hjá Samgöngustofu.
Brautin er í einkaeigu Fjallabyggðar og er bæjarstjórinn sjálfur, Gunnar I. Birgisson skráður ábyrgðarmaður. Í síðustu viku lögðu starfsmenn Árna Helgasonar frá Ólafsfirði, á vegum Fjallabyggðar, nýtt slitlag yfir brautina. Einnig voru settir upp vindpokar og merktar útlínur og endi brautarinnar með þar til gerðum merkingum.
Circle Air hyggst fljúga reglulega með ferðamenn til og frá Siglufirði og þá hentar brautin einnig vel fyrir þær vélar sem nýttar eru í sjúkraflug á Íslandi.
Hér má sjá hvernig flugvöllurinn leit út áður.