Karlmaður særðist lífshættulega í hnífsstunguárás á Akranesi í nótt. Átökin áttu sér stað í heimahúsi og hefur árásarmaðurinn verið handtekinn. Vísir greinir frá þessu.

Fram kemur að karlmaður hafi leitað á sjúkrahúsið á Akranesi á öðrum tímanum í nótt og verið með áverka eftir átök. Hann hafi hins vegar látið sig hverfa áður en læknir gat sinnt honum. Í kjölfarið var tilkynnt um að mikið blóðugur maður væri í heimahúsi skammt frá spítalanum.

Fram kemur að hinn særði hafi verið fluttur beint á slysadeild Landspítalans þar sem hann var talinn í lífshættu. Hann gekkst undir aðgerð og liggur nú á gjörgæsludeild en hann missti mikið blóð við árásina.

Í kjölfarið voru tveir  lögreglubílar sendir á vettvang og voru sérsveitarmenn þar á meðal. Árásarmaðurinn var í kjölfarið handtekinn en fram kemur að hann hafi ekki sýnt neinn mótþróa við handtökuna og var því ekki þörf á aðstoð sérsveitarinnar. Ekki hefur verið tekin ákvörðun um gæsluvarðhald.