Í vikunni var aftöku morðingjans Scott Raymond Dozier frestað á síðustu stundu. Eins og fjölmiðlar greindu frá var ástæðan lögsókn lyfjafyrirtækisins Alvogen sem huggnaðist ekki þær fyrirætlanir yfirvalda að nota lyf fyrirtækisins, Midazolam, í banvænan lyfjakokteil morðingjans.
„Hann var viðbúinn því að vera tekinn af lífi í kvöld,“ sagði lögmaður Dozier þegar fallist var á kröfur Alvogen og aftökunni frestað. Dozier hefur látið hafa það eftir sér að hann vilji deyja sem fyrst í stað þess að hírast á bak við lás og slá. Óvíst er hvenær aftakan fer fram en það verður þó varla á þessu ári.
Dozier fæddist árið 1970 í Nevada-fylki og leiddist snemma af réttri braut. Strax á unglingsaldri byrjaði hann að selja eiturlyf og varð hann stórtækur á því sviði. Hann montaði sig af því að kunna vel við glæpalífið.
Í apríl 2002 hitti Dozier ungan mann, Jeremiah Miller, á móteli í Las Vegas til að selja honum hráefni til eiturlyfjaframleiðslu. Fundurinn endaði með því að Dozier skaut Miller til bana, bútaði lík hans niður og kom þvi fyrir í ferðatöskum sem hann losaði sig síðan við. Hann var handtekinn nokkrum mánuðum síðar og þá kom í ljós að hann hafði einnig gerst sekur um að myrða Jasen „Griffen“ Green og losa sig við líkið með sama hætti.
Fyrir morðið á Green var Dozier dæmdur í 22 ára fangelsi árið 2005 en tveimur árum síðar var hann dæmdur til dauða fyrir morðið á Miller.