Mannréttindadómstóll Evrópu mun á þriðjudaginn kveða upp dóm í máli Egils Eginarssonar Gillzeneggers gegn íslenska ríkinu. Málið er til komið vegna þess að ríkið synjaði miskabótakröfu Egils og kröfu um að fá málskostnað greiddan í meiðyrði máli sem hann sótti árið 2014.
Árið 2014 var rannsókn lögreglu á nauðgunarákærum gegn Gillz felld niður. Miklar umræður voru um mál hans á samfélagsmiðlum. Í einni færslu sakaði kona ein hann um nauðgun á unglingsstúlku og stefndi Egill konunni fyrir meiðyrði. Niðurstaða bæði héraðsdóms og hæstaréttar í málinu var sú að ummælin voru dæmd dauð og ómerk. Hins vegar féllust dómstólarnir ekki á bótakröfu Egils gegn konunni né að ríkið bæri málskostnað hans.
Egill skaut málinu til Mannréttindadómstóls Evrópu sem féllst á að taka málið fyrir og dæmt verður í því á þriðjudaginn eins og áður kom fram. RÚV greinir frá málinu og rifjar upp annað mál Egils fyrir Mannréttindadómstólnum frá síðasta ári:
„Í nóvember síðastliðnum komst Mannréttindadómstóll Evrópu að því að íslenska ríkið hefði brotið gegn réttindum Egils, þegar Hæstiréttur Íslands komst að þeirri niðurstöðu að mynd sem birt var af honum á Instagram og skrifað var „Fuck you rapist bastard“ hafi ekki brotið gegn friðhelgi einkalífs hans.
Var íslenska ríkið þá dæmt til að greiða Agli 2 milljónir króna í miskabætur.“