Kristín Þorkelsdóttir myndlistarmaður biðlar til hjólreiðafólks um að nota bjölluna þegar farið er framúr vegfarendum sem fara hægar, en hún notar gjarnan göngugrind og er nýlega komin á rafskutlu. Í grein sinni í Morgunblaðinu í dag segir hún að þegar hún fór í fyrradag úr Kópavogi yfir á Arnarnes á rafskutlunni sinni hafi 20 hjólreiðamenn tekið fram út henni á 20 mínútum:
„Undanfarið hefur mér oft brugðið illilega þegar hljóðlaust er hjólað fram úr mér. Í fyrradag fóru yfir 20 hjólreiðamenn fram úr mér á litlum 20 mínútum þegar ég brá mér úr Kópavogi yfir á Arnarnes á yndislegum hjóla- og göngustíg meðfram Hafnarfjarðarvegi. Enginn þeirra gerði vart við sig með bjöllunni,“ segir Kristín. „Lítið tíst úr hjólabjöllunni eða smá flaut úr eigin munni kemur í veg fyrir að maður stígi til hliðar í veg fyrir hjólið, sem getur hæglega gerst því hjólreiðar eru svo dásamlega hljóðlátar og svífandi!“
Kristín biðlar til hjólreiðafólks að gera vart við sig, er hún sannfærð að þetta sé aðeins skilningsleysi sem auðvelt sé að laga: „Hjólafólkið þarf á tillitssemi bílstjóranna að halda og við sem ferðumst um á gönguhraða á sömu stígum og þið á hjólunum þurfum á tillitssemi ykkar að halda!“