Myndband af Birni Leifssyni, eiganda World Class, í átökum við viðskiptavin stöðvarinnar ferðast nú hratt manna á milli á samfélagsmiðlum. Uppákoman átti sér stað í útibúi líkamsræktarkeðjunnar í Laugum fyrr í dag. Samkvæmt sjónarvottum hafði viðskiptavinurinn verið að angra starfsfólk og auk þess verið uppáþrengjandi við aðra viðskiptavini stöðvarinnar. Til dæmis með því að standa yfir þeim á meðan þeir kláruðu æfingar sínar. Í kjölfarið kvörtuðu viðskiptavinir undan framkomu mannsins við starfsfólk stöðvarinnar og þá var komið að þætti Björns Leifssonar.

Að sögn sjónarvotta gekk Björn að manninum, tók létt í öxl hans og bað hann vinsamlegast að koma með sér afsíðis. Til öryggis náði Björn líka taka á spýtu sem viðskiptavinurinn hélt á.

Það reyndist vera þjóðráð því viðskiptavinurinn tók afskiptum Björns illa og tókust þeir í kjölfarið á. Hér að neðan má sjá stutt myndbrot af átökum Björns og mannsins.

Í samtali við Vísir gerir Björn lítið úr atvikinu: „Þetta var grey sem var útúrdópaður og ég gekk upp að honum og spurði hvort hann vildi ekki fara og koma aftur þegar hann væri í betra ástandi en hann neitaði. Hann réðst á mig og við tókum hann svo, leiddum hann út og fengum lögregluna til að taka hann,“ segir Björn.