Eldgos hófst í Kilauea eldfjallinu á Hawaii fyrir stundu. Hraun rennur nú inn í íbúðarhverfið Leilani Estates nærri Pahoa. Sprunga er sögð hafa opnast í Leilani Estates. Mikill fjöldi jarðskjálfta hefur verið í og við fjallið síðustu daga en í nótt reið skjálfti upp á 5 yfir. Í framhaldi af því virðist sem sprunga hafi opnast og hraun byrjað að flæða. Eldfjallið er á Big Island eyjunni.
Yfirvöld hafa fyrirskipað íbúum við nokkrar götur í Leilani Estates að yfirgefa heimili sín og neyðarskýli hafa verið opnuð. Erlendar fréttaveitur segja að allt að 10.000 manns hafi nú verið fyrirskipað að yfirgefa heimili sín. Kilauea er virkasta eldfjallið á Hawaii.