Daninn Dennis Bülow Pedersen er alla jafna ánægður þegar hann kemur heim í lok vinnudags og hittir börnin sín. Hann var þó ánægðari og þakklátari í gær en flesta aðra daga enda munaði minnstu að hann sæji ekki börnin sín aftur.
Eins og meðfylgjandi mynd ber með sér mátti litlu muna að álstoð færi í hann þegar hún datt af palli bifreiðar á hraðbraut skammt frá Køge. Dennis var á vinnubílnum og skyndilega sá hann stöngina koma fljúgandi á móti þegar hann ók bifreið sinni á fullri ferð.
Mjög litlu mátti muna að stöngin færi í höfuð hans þegar hún fór í gegnum framrúðu bifreiðarinnar. „Einn sentímetri til eða frá og stöngin hefði farið í gegnum mig. Ég væri dáinn,“ sagði Dennis í samtali við BT í Danmörku og bætir við að hann hafi verið sérstaklega ánægður þegar hann hitti börnin sín í lok vinnudags.
Dennis segir að hann hafi átt erfitt með að sofna í gærkvöldi og það hafi tekið hann þrjár til fjórar klukkustundir. Hvetur hann ökumenn til að gæta að sér þegar þeir flytja farm og tryggja að hann sé kyrfilega festur. „Það tekur ekki lengri tíma en tvær mínútur,“ segir hann.