Í samtali við The New York Post sögðu þær Lucy Watson, Caroline Binns og Carolyn Burton að besta ráðið til að ná svona háum aldri væri að vera einhleyp(ur) í gegnum lífið. Watson sagði að það að hafa ekki gift sig hafi hjálpað henni að ná þessum háa aldri.
„Ég gat ferðast og átt marga kærasta. Það er miklu betra en að eiga eiginmann. Af hverju að binda enda á fjörið?“
En auk þess að ferðast og sleppa því að giftast sagði Watson að hún hafi aldrei drukkið áfengi en hafi í staðinn slökkt þorstanum með Sprite og Pepsi.
Binns er sömu skoðunar og Watson hvað varðar hjónaband og það er Burton einnig en hún þurfti að eigin sögn að hafa fyrir því að vera einhleyp því fimm sinnum hafi hún fengið bónorð.