Jónas Þór Guðmundsson, hæstaréttarlögmaður og fulltrúi Sjálfstæðisflokksins í kjararáði og stjórn Landsvirkjunar, er að gera allt vitlaust á vinnumarkaði. Ákvarðanir kjararáðs, þar sem Jónas Þór gegnir formennsku, hafa hleypt illu blóði í vinnandi fólk sem sér ekki fram á að fá launahækkanir upp á hundruð þúsunda né milljónir króna í afturvirk laun. Fimm manna stjórn ríkisfyrirtækisins Landsvirkjunar, þar sem Jónas Þór gegnir einnig formennsku, hefur einnig fengið ríflega launahækkun, fóru samanlögð laun hans úr 12,7 milljónum í 19 milljónir á einu ári. Samkvæmt síðasta tekjublaði DV var Jónas Þór með 1,6 milljónir króna á mánuði. Það verður forvitnilegt að sjá hver talan verður í næsta tekjublaði og bera hækkunina saman við hækkanir á almenna vinnumarkaðnum sem Jónas Þór er búinn að koma í uppnám.