Argentínska lögreglan haldlagði nýlega tæplega 400 kíló af kókaíni í rússneska sendiráðinu í höfuðborg Argentínu, Buenos Aires. Nokkrir voru handteknir í tengslum við málið. Patricia Bullrich, öryggismálaráðherra landsins, skýrði frá þessu á fréttamannafundi í gær.

Bullrich sagði að kókaínið hefði fundist í hliðarbyggingu sjálfrar sendiráðsbyggingarinnar og væri söluvirði þess um 50 milljónir evra. Hún sagði að glæpagengi hefði reynt að notfæra sér póstþjónustu sendiráðsins, sem nýtur diplómatískrar verndar, til að senda eiturlyfin til Evrópu.

Hún sagði einnig að rússneska og argentínska lögreglan hafi ákveðið að rannsaka málið í sameiningu eftir að rússneski sendiherrann tilkynnti að fíkniefni hefðu fundist í sendiráðinu en það var í desember 2016. Hveiti var sett í stað kókaínsins og eftirlitsmyndavélum var komið fyrir til að fylgjast með pokunum 16 sem kókaínið var í.

Tveir voru handteknir í Argentínu vegna rannsóknar málsins og þrír í Rússlandi. Einn hinna handteknu er fyrrum starfsmaður rússnesku utanríkisþjónustunnar, annar er argentínskur lögreglumaður sem starfar í Buenos Aires.

Bullrich sagði að kókaínið væri mjög ”hreint” og því mjög sterkt. Hún sagði að selja hefði átt efnið í Rússlandi og Þýskalandi en þar býr meintur höfuðpaur smyglhringsins en Bullrich sagðist telja að þýska lögreglan muni hafa hendur í hári hans en hann er nú á flótta.