Um þessar mundir er verið að vinna að stofnun hagsmunasamtaka veipara. Þessu er greint frá í Facebook-hópnum „Iceland Vapes,“ en í honum eru rúmlega fimm þúsund manns. Unnar Þór Sæmundsson segir frá þessu í færslu sem var birt í hópnum í gær. Unnar Þór hefur verið virkur í starfi Pírata.
„Það eru margar ástæður fyrir svona samtökum, sú stærsta er að fá sæti við borðið þegar þessi mál eru rædd á þingi og annars staðar,“ segir Unnar.
Hann segir að hann vonist til að stofnfundur samtakanna verði vel sóttur og fari fram í næstu viku.
Að lokum spyr Unnar hópmeðlimi hvort það sé „ekki stemning fyrir stórum hitting og að vera stofnfélagi í samtökunum.“
Þegar þessi frétt er skrifuð hafa um tíu manns skrifað undir færsluna og gefið út að þeir ætli að mæta galvaskir á svæðið.
Á næstu dögum verður frumvarp Svandísar Svavarsdóttur, heilbrigðisráðherra, lagt fram á Alþingi. Frumvarpið kveður um rafrettur og áfyllingar fyrir rafrettur. Margir innan veipsamfélagsins eru á móti frumvarpinu. Hjalti Ásgeirsson hefur verið ötull talsmaður gegn frumvarpinu og segir meðal annars að verði það samþykkt muni fleiri fara að reykja aftur tóbak og vape vörur endi á svarta markaðinn.
Mynd af veipara er fengin frá vaping360
