Eftir víðtæka leit að 49 ára skíðagöngumanni fannst hann í 4.000 kílómetra fjarlægð frá staðnum þar sem síðast hafði sést til hans. Maðurinn, Constantinos Filippidis, var á gönguskíðum í Whiteface Mountain Ski Resort í Wilmington í New York ríki þegar hann hvarf þann 7. febrúar.

Mikil leit var gerð að Filippidis, sem starfar sem slökkviliðsmaður í Toronto í Kanada, en hún skilaði engum árangri. Bandarískir fjölmiðlar segja að Filippidis hafi síðan skyndilega birst á alþjóðaflugvellinum í Sacramento í Kaliforníu þann 13. febrúar og var hann þá í skíðaskóm, skíðaúlpunni sinni og með hjálm. Hann var þá nýklipptur, með nýjan iPhone en mundi lítið eftir ferðum sínum. Hann sagðist þó ráma í að hann hefði ekið lengi í stórum flutningabíl.

Engir áverkar voru á honum og fékk hann því fljótlega að snúa aftur heim til Kanada en lögreglan vinnur enn að rannsókn málsins og hefur auglýst eftir vitnum í þeirri von að einhver hafi séð til ferða Filippidis. Sjálfur telur Filippidis að hann hafi fengið höfuðhögg og því muni hann ekki hvað gerðist.