Steingrímur J. Sigfússon, forseti Alþingis, hefur um áratugaskeið búið í Seljahverfinu í Breiðholti en fær 1,6 milljónir á ári fyrir að vera með lögheimili á Þistilfirði. Fyrst í húsi við Brekkusel, en í október 1999 fjárfesti hann, ásamt eiginkonu sinni Bergnýju Marvinsdóttur, í einbýlishúsi við Þingasel 6, sem er heilir 314,6 fermetrar að stærð. Um einstaklega glæsilega eign er að ræða sem er í dag metin hátt í 100 milljónir. Verður það að teljast við hæfi að einn þaulsætnasti alþingismaður þjóðarinnar búi við Þingasel. Húsið kostaði á sínum tíma 23,1 milljón króna og gat Steingrímur greitt um 16,3 milljónir út í hönd. Afgangurinn, tæpar 7 milljónir króna, var tekinn að láni. Steingrímur er með 1,8 milljónir króna í laun á mánuði sem forseti Alþingis.

Steingrímur keypti Brekkusel í júlí árið 1987, þýðir það að hann hefur búið í Seljahverfinu í minnst 30 ár. Á sama tíma hefur hann verið með skráð lögheimili á Gunnarsstöðum í Þistilfirði og fengið fyrir það húsnæðis- og dvalargreiðslur. Steingrímur, líkt og aðrir þingmenn kjördæma utan höfuðborgarsvæðisins, fær mánaðarlega greiddar 134.041 krónu í húsnæðis- og dvalarkostnað. Það gera 1.608.492 krónur á ári.

Steingrímur hefur setið á þingi sem þingmaður Norðausturkjördæmis, áður Norðurlands eystra, frá árinu 1983. Greiðslurnar fyrir húsnæðis- og dvalarkostnað hafa hækkað í takt við laun þingmanna, fékk Steingrímur til dæmis 72.450 krónur í húsnæðis- og dvalarkostnað árið 2003.

Hefur aldrei sótt um álagsgreiðslur

Fjárhæðin er ætluð til að standa undir húsnæðiskostnaði á höfuðborgarsvæði eða í kjördæminu ef þingmaður býr á höfuðborgarsvæðinu. Samkvæmt reglum þingsins getur þingmaður sem á aðalheimili utan höfuðborgarsvæðisins, og annað heimili í Reykjavík óskað eftir að fá greitt 40 prósenta álag. Steingrímur segir í svari við fyrirspurn DV að hann hafi aldrei sótt um slíkar álagsgreiðslur. „Ég fæ greiddan húsnæðis- og dvalarkostnað eins og yfirleitt aðrir landsbyggðarþingmenn, en hef aldrei sótt um álagsgreiðslur vegna tvöfalds heimilishalds,“ segir Steingrímur.