„Hvað heldurðu að hann hafi mörg mannslíf og fjölskylduhamingju á samviskunni, bæði frá því sem ritstjóri DV og ritstjóri Stundarinnar og þá stjórnarformaður Stundarinnar?“
Þetta sagði Arnþrúður Karlsdóttir í símatíma Útvarpssögu í gærmorgun. Rétt er að taka fram að Reynir hefur aldrei verið ritstjóri Stundarinnar. Fréttablaðið greinir frá því núna í kvöld að Reynir Traustason fyrrverandi ritstjóri DV og stjórnarformaður Stundarinnar ætli ekki að sitja þegjandi og hljóðalaust undir slíkum ásökunum, ásakanirnar séu alvarlegar og um mikinn atvinnuróg að ræða. Ætlar hann að mæta Arnþrúði af fullri hörku. Arnþrúður sakaði Reyni einnig um að skrifa fréttir byggðar á lygi.
Arnþrúður sagði jafnframt:
„Hvað heldurðu að hann hafi mörg mannslíf á samviskunni þar sem hann hefur lagt heilu fjölskyldurnar og fólk í rúst út af athugasemdakerfinu sem hann lét með lygafréttum sem hann framleiddi.“
Í samtali við Fréttablaðið segir Reynir:
„Arnþrúður hefur sagt margt í gegnum tíðina en nú gekk hún of langt og þessum rakalausa atvinnurógi og ærumeiðingum verður mætt af fullri hörku.“