„Eins og er er starf rithöfunda, til dæmis hjá því opinbera, skilgreint sem hlutastarf,“ segir Karl Ágúst Úlfsson leikari og formaður Rithöfundasambandsins en hann gagnrýnir bág kjör rithöfunda á Íslandi. Hann óttast fækkun í stéttinni.

Karl Ágúst er sjálfur með meistaragráðu í leikritun og handritagerð og hefur skrifað og þýtt fjölda leikverka auk þess sem hann hefur  sinnt kennslu í leikritun og skapandi skrifum

Í samtali við útvarpsþáttinn Orð um bækur á Rás 1 bendir Karl Ágúst á þá staðreynd að hér á landi er almennt ekki litið á starf rithöfundarins sem „alvöru vinnu.“

„Það er enginn rithöfundur á fullum launum og það er eitthvað sem við verðum að skoða mjög alvarlega. Það eru alls konar teikn á lofti um það að tungumálið eigi í vök að verjast. Eitt af því öflugasta verkfæri sem við höfum í höndunum eru bókmenntir eða ritlist,“

Karl Ágúst  telur nauðsynlegt að styðja við þá sem leggja fyrir sig skapandi skrif.

„Ef við gerum það ekki þá missum við okkar besta fólk til annarra starfa. Það verður hér algjör flótti. Höfundar berjast í bökkum. Það eru örfá dæmi um það að höfundar séu á einhverjum alvöru launum eða launakjörum. Meginþorri rithöfunda er að þessu næstum í hjáverkum.“