„Ég veit ekki alveg af hverju allir eru svona frábærir, en það er mjög indælt að fá svona stuðning. Það er mikið af fólki þarna sem er fólkið mitt. Það er gott að sjá að þetta hafi haft einhver áhrif, að öryrki úti í bæ hafi gert eitthvað sem skiptir máli,“ segir Bára Halldórsdóttir sem mætti fyrir Héraðsdóm Reykjavíkur á fjórða tímanum í dag.

Bára var boðuð fyrir dóminn þar sem fjórir skjólstæðingar Reimars Péturssonar, lögmanns, hafa lagt fram beiðni um vitnaleiðslur og öflun sýnilegra sönnunargagna vegna málsins. Bára segist annars vegar hafa ekki verið spurð efnislega út í málið. „Ég held að ég sé meira óviss núna en þegar ég labbaði inn,“ segir hún og gerir ráð fyrir að framhald í málinu skýrist undir vikulok.

„Ég tek bara því sem kemur og hef alltaf gert,“ bætir hún við.

Spurð að því hvort Klaustursmálið hafi haft mikil áhrif á einkalífið svarar hún: „Það eru stærri hlutir að gerast í mínu persónulega lífi sem ég get ekki spjallað um.“

Viðtalið við Báru má sjá á neðan og byrjar á mínútu 23:01.