Hemn Rasul Hamd var dæmdur í tveggja og hálfs árs fangelsi í Héraðsdómi Reykjavíkur í gær fyrir að hafa nauðgað konu á salerni skemmtistaðarins Hressó í febrúar 2016. Hamd játaði að hafa átt samfarir við konuna inni á salerninu en sagði þær hafa verið með hennar samþykki.

Fréttablaðið skýrir frá þessu. Samkvæmt ákæru nauðgaði Hamd konunni, beitti hana ofbeldi og notfærði sér að hún gat ekki veitt mótspyrnu.

Konan sagðist hafa drukkið þrjá bjóra þetta kvöld en hafi fundið fyrir miklum áfengisáhrifum eftir að hafa drukkið þann síðasta. Vitni sögðu að ölvunarástand konunnar hefði ekki verið í samræmi við áfengisneyslu hennar en gefið er í skyn að hugsanlega hafi henni verið byrluð ólyfjan.

Hamd þarf einnig að greiða konunni 1,5 milljónir í miskabætur.