Inga Björk Bjarnadóttir, formaður framkvæmdastjórnar Samfylkingarinnar, segir að Ágúst Ólafur Ágústsson, þingmaður flokksins, hafi sagt henni ósatt um tilkynningu sem hann sendi frá sér um samskipti hans við Báru Huld Beck. Bára svaraði tilkynningu Ágústs í gær og segir hann ekki hafa farið með rétt mál í frásögn hans af samskiptum þeirra.

Ágúst var áminntur af trúnaðarnefnd Samfylkingarinnar fyrir áreiti hans gegn Báru. Fréttablaðið hefur eftir Ingu Björk að hún hafi trúað því að Ágúst Ólafur hefði sent yfirlýsinguna frá sér í samráði við Báru Huld og það hafi henni verið sagt skömmu áður en yfirlýsingin var send út.

„Auðvitað hryggir það mig mjög að svo hafi ekki verið. Auðvitað brýtur Ágúst Ólafur mitt traust sem formanns framkvæmdastjórnar, þegar mér er sagt að tilkynningin hafi verið send út í samráði við þolanda.“

Hefur Fréttablaðið eftir Ingu Björk.

Ágúst Ólafur játaði brot sitt fyrir trúnaðarnefnd flokksins en í henni fólst að hann reyndi endurtekið að kyssa Báru Huld í óþökk hennar. Hann niðurlægði hana síðan með móðgandi athugasemdum um útlit hennar og vitsmuni að hennar sögn.