Meðlimum í stuðningshópi fyrir uppljóstrarann Báru Halldórsdóttur hefur fjölgað hratt í kjölfar þess að hún var boðuð fyrir dóm.

Málið kemur í kjölfar þess að fjórir af sexmenningunum frá Klaustri sendu beiðni til Persónuverndar um rannsókn málsins. Undir hana rituðu þingmenn Miðflokksins, þau Anna Kolbrún Árnadóttir, Bergþór Ólason, Gunnar Bragi Sveinsson og Sigmundur Davíð Gunnlaugsson. Þingmenn flokks fólksins hafa hins vegar ekki óskað eftir rannsókn.

„Verndum Báru,“ stendur í lýsingu Facebook-hópsins Takk Bára, sem hefur verið stofnaður til þess að sýna henni hversu þakklátir margir eru fyrir að festa samtal þingmannanna á upptöku og dreifa henni til fjölmiðla. Þar er fólk einnig hvatt til að safna fyrir lögfræðikostnaði eða sekt Báru þegar nánar skýrist í málinu, en það verður tekið fyrir á mánudag í Héraðsdómi Reykjavíkur klukkan 15:15. Hefur meðal annars verið skipulagður viðburður á síðunni þar sem fólk ætlar að mæta í Héraðsdóm Reykjavíkur til að sýna Báru stuðning.

Þegar DV hafði samband við Báru vegna málsins sagði hún stefnuna ekki sýna þingmennina í góðu ljósi. „Ég mæti bara og stend fyrir mínu máli,“ segir Bára.

Þegar þetta er ritað hafa yfir 3000 manns skráð sig í hópinn, en fjöldinn fer afar hratt vaxandi.