Uppljóstrarinn frá Klaustur Bar, Bára Halldórsdóttir, hefur verið boðuð fyrir dóm. Málið kemur í kjölfar þess að fjórir af sexmenningunum frá Klaustri sendu beiðni til Persónuverndar um rannsókn málsins. Bára hefur nú fengið boðun vegna málsins og verður það tekið fyrir á mánudag í Héraðdómi Reykjavíkur, dómshúsinu við Lækjartorg. Þinghald hefst kl. 15:15 í dómsal 101.
Ekki er um kæru að ræða heldur beiðni um vitnaleiðslur og öflun sýnilegra sönnunargagna. Þess má geta að nafn Báru misritaðist í boðuninni og er hún ávörpuð Bára Guðmundsdóttir í bréfinu.
DV hafði samband við Báru vegna málsins og sagði hún: „Ég bara veit ekki hvað ég á að segja. Ég mæti bara og stend fyrir mínu máli.“
Bára segir enn fremur: „Mér finnst þetta ekki sýna þá í góðu ljósi, fjórmenningana.“ Undir beiðni til Persónuverndar um rannsókn málsins skrifuðu þingmenn Miðflokksins sem voru í samsætinu á Klaustri en ekki þingmenn Flokks fólksins. Undir beiðnina rituðu því Anna Kolbrún Árnadóttir, Bergþór Ólason, Gunnar Bragi Sveinsson og Sigmundur Davíð Gunnlaugsson. Þeir Ólafur Ísleifsson og Karl Gauti Hjaltason, sem voru þingmenn Flokks fólksins, þegar málið kom upp, en eru núna óháðir þingmenn, hafa ekki óskað eftir rannsókn.