Gunnlaugur M. Sigmundsson, faðir Sigmundar Davíð Gunnlaugssonar og fyrrverandi þingmaður, sendi Félagi sérkennara tölvupóst og kvartaði undan yfirlýsingu félagsins um ranga skráningu Önnu Kolbrúnar Árnadóttur, þingmanns Miðflokksins, á vef Alþingis. Líkt og hefur komið fram var hún þar ranglega skráð sem ritstjóri Glæða, fagtímarits sérkennara.
Fréttablaðið greinir frá þessu. Sædís Ósk Harðardóttir, ritstjóri Glæða og formaður Félags sérkennara, segir í viðtali við blaðið að tölvupóstur Gunnlaugs hafi ekki verið svaraverður. „Það eina sem ég vil segja um þetta er að þetta var mjög óviðeigandi tölvupóstur,“ er haft eftir Sædísi.
Gunnlaugur telur að félagið hafi sparkaði í liggjandi manneskju með yfirlýsingu sinni. Hann segir að Anna Kolbrún sé með krabbamein og því eigi ekki að gagnrýna hana nú. „Almennt talað í dýraríkinu er þetta þannig, og þeir sem þekkja hænsnabú vita, að ef einhver hæna er veik þá fara allar hinar hænurnar að ráðast á hina veiku. Og mér finnst bara að við mannfólkið þurfum ekki að haga okkur eins. Þarna er mjög mikið veik kona og þá kemur allt þetta lið sem er búið að hafa mánuði til þess að gera athugasemdir. En núna, vegna þess að hún liggur veik fyrir, þá er þetta eins og í hænsnabúi; ráðist á hana og kroppað og kroppað og kroppað,“ hefur Fréttablaðið eftir Gunnlaugi.
