Sverrir Þór Sverrisson, einn af handritshöfundum Skaupsins í ár lýsir því hvernig sum atriði sem skrifuð er í handritið geta orðið „úrelt“ áður en þau eru sýnd á gamlárskvöld, og hætt að vera fyndin sökum þess að ákveðin fréttamál í samfélaginu taka óvænta stefnu.

Auk Sveppa koma Ilmur Kristjánsdóttir, Jón Gnarr, Katla Margrét Þorgeirsdóttir, Katrín Halldóra Sigurðardóttir, Sveppi og Arnór Pálmi Arnarson að handritsskrifum fyrir Áramótaskaupið 2018. Þá leikstýrir Arnór Pálmi Skaupinu annað árið í röð.

Í samtali við Sunnudagssögur á Rás 2 ræðir Sverrir Þór, betur þekktur sem Sveppi, meðal annars um  krísufundinn sem haldinn var hjá handritsteyminu í seinustu viku eftir að Klausturmálið svokallaða kom upp. Líkt og gefur að skilja þá er árið ekki búið og ýmislegt getur komið upp í þjóðfélaginu.

„Við vorum til dæmis búin að taka upp atriði með Skúla Mogensen, það atriði er svo eiginlega ónýtt í dag. Mig langaði helst að hringja í Skúla og biðja hann um að setjast niður og slaka á. Hvort hann geti ekki gengið frá þessu eftir áramót. Leyfðu okkur að gera grín að þér í friði!“

Að sögn Sveppa var svo sannarlega enginn skortur á hugmyndum innan hópsins varðandi Klausturmálið.

„Þetta Klausturmál, þó það sé varla hlæjandi að því, þá datt okkur strax í hug um fimmhundruð brandarar. Svo er það nú svolítið erfitt að þegar okkur höfundum Skaupsins dettur eitthvað fyndið í hug, þá er kannski einhver annar búinn að gera grínið þitt á netinu. Þá er erfitt að gera sama grín í Skaupinu, þó hugmyndin hafi kviknað hjá okkur þá er eins og við séum að stela þessu af fólkinu sem var með sama grínið á Twitter eða Facebook.“