Þetta kemur fram í Fréttablaðinu í dag. Þar segir að á undanförnum árum hafi opnum vinnurýmum fjölgað í bankanum og nú vinni um sjötíu prósent starfsmanna í slíkum rýmum. Aukinn hávaði og truflanir vegna vinnu annarra fylgir oft opnum vinnurýmum og það er raunin í Seðlabankanum. Einnig hefur hljóðmengun frá loftræstikerfi hússins aukist við breytingarnar. Ekki eru opnanlegir gluggar á byggingu Seðlabankans við Kalkofnsveg og loftræstikerfi því nauðsynlegt.
Eftir að loftgæði höfðu verið mæld og gripið hafði verið til aðgerða til að bæta hitastýringu, loftræstingu frá eldhúsi og meira var lagt upp úr hreinsun gólfteppa var ákveðið að bjóða þeim starfsmönnum, sem það vildu, að fá hljóðdempandi heyrnartól en þau er meðal annars hægt að tengja við síma. Þetta kemur fram í svari Seðlabankans við fyrirspurn Fréttablaðsins.
Um 180 manns starfa hjá Seðlabankanum og hafa rúmlega 100 þeirra nýtt sér þetta og fengið heyrnartól.