„Dansinn er alltaf númer eitt, tvö og þrjú mér en ég held að það sé nauðsynlegt að ögra sjálfum sér eins mikið og hægt er,“ segir Ásta Björk Ívarsdóttir í samtali við Extrabladet í Danmörku. Ásta Björk keppir um þessar mundir í sjónvarpsþáttunum Vild med dans þar í landi en um er að ræða dönsku útgáfuna af Dancing with the Stars.

„Íslensk dansgella: „Svona held ég mér í formi“ er titill greinarinnar. Þar segir að Ásta Björk telji ekki hitaeiningar né sé hún fylgjandi öfgakenndu mataræði. Hún stundi hins vegar líkamsrækt eða dans á hverjum degi.

Óhætt er að segja að Ásta Björk hafi slegið rækilega í gegn í þáttunum ásamt dansfélaga sínum, danska leikaranum Simon Stenspil en þau eru nú komin í undanúrslit eftir glæsilega frammistöðu í þættinum síðastliðin föstudag.

Ásta Björk ræðir við Extrabladet um bakgrunn sinn og leyndarmálin að baki þessum glæsta árangri.

Blaðamaður Extrabladet segir árangur Ástu vera afrakstur þrotlaustra æfinga.  Fram kemur að Ásta lauk menntaskólanámi fyrir ári síðan og hafi stundað styrktaræfingar áður en hún hóf þáttöku í Vild med dans í september síðastliðnum.

Þá segir hún hefðbunda líkamsrækt á borð við hlaup ekki höfða til sín.„Ég hef reynt en ég held að dansinn sé betri af því að maður gleymir að maður er að stunda líkamsrækt.“

Fyrir utan þrotlausar æfingar passar Ásta vel upp á matarræðið en hún tekur fram að hún sé þó enginn sérfræðingur í næringarfræði.

„Það er fínt að halda sig frá kolvetnum. Ég reyni að hugsa vel um líkama minn.  Augljóslega hefur það ekki góð áhrif á líkamann að lifa eingöngu á McDonalds,“ segir Ásta að lokum en hún kýs að neyta fæðu sem gefur henni orku og vellíðan til að sinna ástríðu sinni.