Nokkrir ökumenn hafa verið kærðir fyrir hraðakstur í umdæmi lögreglunnar á Suðurnesjum á undanförnum dögum. Sá sem hraðast ók mældist á tæplega 140 kílómetra hraða á Reykjanesbraut þar sem hámarkshraði er 90 kílómetrar á klukkustund.
Þetta kemur fram í skeyti frá lögreglu.
Ökumaðurinn umræddi vera aðeins sautján ára gamall og var forráðamönnum hans gert viðvart um hraðaksturinn. Samkvæmt sektarreikni Umferðarstofu á pilturinn yfir höfði sér 150 þúsund króna sekt.
Þá segir lögregla að fáeinir ökumenn hafi verið teknir úr umferð vegna gruns um fíkniefna- eða ölvunarakstur og reyndist einn þeirra vera sviptur ökuréttindum.
Nokkur umferðaróhöpp hafa orðið í umdæminu á síðustu dögum en þau voru öll minni háttar.