Rúmlega einn af hverjum þremur Íslendingum hefur ekki lesið bók á íslensku sér til skemmtunar á síðustu 12 mánuðum. Þetta kemur fram í niðurstöðum nýrrar könnunnar MMR á lestrarvenjum landsmanna. Nær helmingur landsmanna, 42%, sagðist að jafnaði lesa bækur í hverri viku

Kváðust 41% svarenda eingöngu hafa lesið bækur á íslensku sér til skemmtunar, 27% kváðust hafa lesið bækur á bæði íslensku og öðrum tungumálum og 7% kváðust einungis hafa lesið bækur á öðrum tungumálum. Þá kváðust 25% svarenda ekki hafa lesið neinar bækur sér til skemmtunar yfir síðustu 12 mánuði.

Konur, 74%, voru líklegri en karlar, 62%, til að segjast hafa lesið bækur á íslensku sér til skemmtunar en 48% kvenna kváðust að jafnaði lesa vikulega eða oftar, samanborið við 36% karla. Ungt fólk les minna en þeir sem eldri eru, 31% svarenda á aldrinum 18-29 ára kvaðst ekki hafa lesið bækur yfir síðustu 12 mánuði og 24% til viðbótar kvaðst að jafnaði lesa sjaldnar en mánaðarlega. Lestur jókst einnig með aukinni menntun og heimilistekjum.

Þegar litið var til stjórnmálaskoðana kom í ljós að stuðningsfólk Vinstri grænna var líklegast til að segjast lesa bækur á íslensku sér til skemmtunar, eða heil 88%. Þá var stuðningsfólk Flokks fólksins, 37%, og Miðflokksins, 31%, líklegast til að segjast ekki hafa lesið bækur sér til skemmtunar yfir síðustu 12 mánuði.

Könnunin var gerð dagana 8.-12. nóvember 2018. 1048 einstaklingar svöruðu.