Tveir karlmenn hafa verið dæmdir í tveggja mánaða skilorðsbundið fangelsi vegna líkamsárásar á skemmtistaðnum American Bar í apríl 2016.
Fram kemur að komið hafa til átaka á milli mannanna tveggja og fórnarlambs árásarinnar inni á skemmtistaðnum. Í þeim átökum sló annar maðurinn fórnarlambið hnefahögg í andlitið.
Fyrir utan skemmtistaðinn héldu átökin áfram. Fórnarlambið lýsti því þannig fyrir dómi að mennirnir hefðu ráðist á sig og slegið sig en hann hefði varist. Í þessum átökum hefðu hann og annar mannanna fallið í götuna og við það hefði fingur hans brotnað.
Afleiðingarnar árásarinnar voru þær að fórnarlambið fingurbrotnaði á litla fingri vinstri handar, hlaut mar á kinn vinstra megin, bólgu fyrir aftan vinstra eyra og yfirborðsáverka á hálsi.
Sannað þótti með framburði vitna að mennirnir tveir hefðu staðið að árásinni. Lögreglumenn, sem komu á vettvang, báru sömuleiðis að þá hefðu mennirnir og fórnarlambið verið í slagsmálum.
Hvorugur mannanna hefur áður hlotið refsingu. Auk fangelsisrefsingarinnar er þeim gert að greiða fórnarlambinu 400 þúsund krónur í miskabætur, auk sakarkostnaðar.