Bæjarráð Árborgar hefur samþykkt samning við Harald Líndal Haraldsson, fyrrum bæjarstjóra í Hafnarfirði, um að gera úttekt á stjórnsýslu, rekstri og fjármálum sveitarfélagsins. Kostnaðurinn getur orðið allt að 13 milljónir. Vinnunni á að vera lokið í síðasta lagi um miðjan desember.

Fréttablaðið skýrir frá þessu í dag. Fram kemur að ekki hafi náðst samstaða um málið í bæjarráði, meirihlutinn hafi samþykkt samninginn en fulltrúi Sjálfstæðisflokksins hafi verið á móti. Samkvæmt samningnum geta allt að 550 klukkustundir farið í úttektina. Haraldur tekur 19.000 krónur á klukkustund fyrir vinnu sína auk virðisaukaskatts. Kostnaðurinn getur því farið upp í 13 milljónir, auk þess fær hann aksturskostnað endurgreiddan.

Fréttablaðið segir að útboðsskylda stofnist hjá sveitarfélögum þegar kostnaðurinn er 15,5 milljónir, án virðisaukaskatts, en sé kostnaðurinn undir þeirri upphæð beri sveitarfélögum engu síður að viðhafa samkeppni, til dæmis með því að spyrjast fyrir um verð hjá helstu aðilum sem veita þá þjónustu sem á að kaupa. Fréttablaðið hefur eftir Eggert Val Guðmundssyni, oddvita bæjarráðs, að hvorki hafi verið gerð verðkönnun eða tilboða leitað.