Stærsti UFC-bardagi sögunnar endaði á skelfilegan hátt þegar hópslagsmál brutust út eftir bardaga þeirra Conor McGregor og Khabib Nurmagomedov.
Conor tapaði bardaganum þegar Rússinn Khabib náði uppgjafartaki í fjórðu lotu. Þegar ljóst var að Khabib hefði unnið bardagann byrjaði hann að hrauna yfir Conor og félaga hans. Khabib stökk svo út úr hringnum og réðst á Dillon Danis, liðsfélaga Conors. Annar úr hópi Rússans reyndi svo að slá til Conor McGregor.
Átján þúsund manns voru í T-Mobile höllinni til að fylgjast með bardaganum og voru lætin um tíma gríðarleg.
Bæði Khabib og Conor voru leiddir út úr höllinni og fékk Khabib ekki einu sinni afhent beltið fyrir sigurinn. Khabib átti að fá tvær milljónir dala fyrir bardagann en greiðslan hefur verið sett á frost meðan málið er skoðað. Þrír félagar Rússans voru handteknir eftir bardagann. Þeim var að vísu sleppt eftir að Conor sagði að hann myndi ekki kæra árásina.
Á blaðamannafundi eftir bardagann var Khabib fámáll en baðst þó afsökunar á hegðun sinni. Hann gagnrýndi Conor þó og sagði hann hafa sýnt af sér slæma hegðun í aðdraganda bardagans.
Dana White, forseti UFC, lýsti vonbrigðum sínum með uppákomuna. „Í átján ár hef ég unnið að því að koma þessari íþrótt á þann stað sem hún er á í dag. Þetta er mjög persónulegt, ég hef unnið að þessu svo lengi. Þetta er mjög svekkjandi.“
Mike Tyson, einn þekktasti hnefaleikakappi sögunnar, var hálf orðlaus eftir bardagann eins og sjá má í tísti hér að neðan.
Þetta var ekki eina uppákoman í höllinni í nótt því áður en bardaginn hófst brutust út slagsmál milli stuðningsmanna þeirra Conors og Khabib.
ALL HELL BRAKING LOOSE BETWEEN KHABIB AND MCGREGOR #UFC229 pic.twitter.com/fmaguMrEVq
— Ellis (@EllisGodlike) October 7, 2018
Watching the @TheNotoriousMMA vs @TeamKhabib fight. Unimaginable never thought it would go down like this. Crazier than my fight riot.
— Mike Tyson (@MikeTyson) October 7, 2018