Héraðsdómur Reykjavíkur hefur staðfest ákvörðun dómsmálaráðherra um að framselja skuli meintan höfuðpaur í hinu svokallaða Euromarketmáli til Póllands. Pólsk stjórnvöld kröfðust framsals á þeim grunni að þau séu að rannsaka aðild mannsins að skipulagðri brotastarfsemi og flutningi fíkniefna á milli landa.

Fréttablaðið skýrir frá þessu í dag. Fram kemur að úrskurðurinn hafi verið kærður til Landsréttar. Haft er eftir Steinbergi Finnbogasyni, verjanda mannsins, að töluvert skorti á að tekin hafi verið afstaða til þeirra sjónarmiða sem voru sett fram í málinu. Litið hafi verið framhjá mannúðarsjónarmiðum en hér sé nánast eins og verið sé að framselja Íslendinga. Maðurinn hafi búið hér í rúmlega 10 ár og eigi konu og barn og sé með eiginn atvinnurekstur og tengist samfélaginu á ýmsan hátt.

Rannsókn lögreglunnar hér á landi á máli mannsins snýr að innflutningi fíkniefna og peningaþvætti en þetta hafði Fréttablaðið eftir Margeiri Sveinssyni, yfirmanni miðlægrar deildar lögreglunnar á höfuðborgarsvæðinu, í júlí.