Bifreið var ekið inn í verslun í Breiðholti um kl. 23 í gærkvöldi. Segir Lögreglan á höfuðborgarsvæðinu að engan hafi sakað og að ökumaðurinn hafi látið sig hverfa. Þegar lögreglan hafði samband við eiganda bifreiðarinnar þá kom hann af fjöllum og hafði ekki áttað sig á því að bifreiðin hafði verið tekin ófrjálsri hendi.
Það var mikið að gera hjá lögreglu í gærkvöldi og í nótt. Síðdegis í gær var maður í annarlegu ástandi handtekinn á vínveitingastað í miðbænum eftir að hafa verið að meðhöndla hníf innandyra. Kl. 19 var ökumaður handtekinn fyrir að bakka á annan bíl, er hann grunaður um ölvun við akstur.
Um kl. 23 í gærkvöldi var tilkynnt um ölvaðan mann sem hafði veist að öryggisvörðum í verslun í miðbænum. Hann var handtekinn og gistir fangageymlsur þar til hann verður hæfur til skýrslutöku.
Þegar klukkan var að verða 3 var ölvaður karlamaður handtekinn á skemmtistað í miðbænum eftir að hafa verið að angra og trufla dyraverði, sjúkraflutningsmenn og lögreglu sem voru að sinna öðru máli á staðnum. Hálftíma síðar var tilkynnt um umferðaróhapp í Vesturbænum og skömmu síðar var ölvaður ökumaður handtekinn skammt frá vettvangi grunaður um að hafa orðið valdur að óhappinu.
Einn ölvaður ökumaður bar stöðvaður í nótt í Vesturbæ, tveir í Kópavogi og tveir í Breiðholti.