Maður hefur verið dæmdur í sex mánaða fangelsi fyrir ýmsa glæpi en þar á meðal stal hann veski manns á hjólastól. Samkvæmt dómi þá geymdi maðurinn veski sitt undir setunni á hjólastól sínum en hinn dæmdi stal því og hljóp á brott.
Hann er auk þess dæmdur fyrir að hafa keyrt þrjú mismunandi skipti undir áhrifum lyfjakokteils. Sem dæmi um þau lyf sem mældust í blóði hans má nefna alprazólam, metýlfenídat, oxýkódon klórdíazepoxíð desmetýlklórdíazepoxíð, morfín og amfetamín.
Ofan á þetta var hann dæmdur fyrir að hafa stolið ýmsum vörum bæði úr búð og kyrrstæðum bílum. Hann stal háreyðingatæki, bolla og snyrtivörum, svo nokkuð sé nefnt. Síðan var hann dæmdur fyrir fjársvik en hann notaði kort konu í heimildarleysi í verslunum.
Maðurinn er fæddur árið 1980 og á að baki langan sakaferil. Hann var enn fremur á skilorði þegar hann framdi brotin. Dómari tekur sérstaklega fram að það sé honum til refsiþyngingar að hann hafi stolið veski manns í hjólastól.
Líkt og fyrr segir þá var hann dæmdur í sex mánaða óskilorðsbundið fangelsi og er sviptur ökurétti í þrjú ár.