Óboðinn, ölvaður gestur heimsótti heimili í umdæmi lögreglunnar á Suðurnesjum í gærkvöldi og hreiðraði um sig í sófa í stofunni. Húsráðandi var á efri hæð að horfa á sjónvarp þegar hann heyrði umgang á neðri hæðinni.
Þetta kemur fram í tilkynningu frá Lögreglunni á Suðurnesjum. Húsráðandi taldi í fyrstu að þarna væru heimilisvinir á ferðinni en ákvað svo að athuga málið nánar og fór niður á neðri hæð. Þar sat hinn óboðni í stofusófanum og lét fara vel um sig.
Erfiðlega gekk að ræða við hann sökum tungumálaörðugleika. Lögreglumenn fjarlægðu hann af heimilinu og fluttu hann á lögreglustöð þar sem hann fékk gistingu að eigin ósk.