Eins og kunnugt er var skútu, sem heitir Inook, stolið úr höfninni á Ísafirði aðfaranótt sunnudags. Svo virðist sem þjófnaðurinn hafi verið vel skipulagður og að einn eða fleiri kunnáttumenn hafi verið að verki. Áhöfn þyrlu Landhelgisgæslunnar fann skútuna síðdegis í gær eftir að lögreglan á Vestfjörðum hafði beðið um aðstoð við að finna hana. Skútunni var síðan siglt til hafnar á Rifi á Snæfellsnesi þar sem skipstjórinn, sem er grunaður um að hafa stolið henni, var handtekinn.

Morgunblaðið skýrir frá þessu í dag. Eins og fjölmiðlar skýrðu frá í gær fann áhöfn þyrlunnar skútuna fljótlega og fór síðan til Reykjavíkur til að sækja tvo sérsveitarmenn frá embætti ríkislögreglustjóra og tvo menn frá séraðgerðarsviði Landhelgisgæslunnar. Þeir biðu skútunnar síðan á Rifi en skipstjóra hennar höfðu verið gefin fyrirmæli um að sigla þangað. Skútan kom þangað um klukkan níu í gærkvöldi og var skipstjóri hennar einn um borð.

Skipstjórinn var handtekinn og verður yfirheyrður í dag að sögn lögreglunnar á Vestfjörðum. Morgunblaðið hefur eftir heimildarmanni að þjófnaðurinn á skútunni hafi verið vel skipulagður og hafi krafist aðkomu eins eða fleiri manna sem kunnu til verka, málið sé mjög dularfullt.

Eigandi skútunnar er sagður hafa verið á Ísafirði fyrir nokkrum dögum. Skútunni var siglt þangað fyrr í haust en þar átti að geyma hana í vetur. Morgunblaðið segir að hún hafi verið bundin við tvær aðrar skútur aftast í höfninni og fyrir framan þær hafi þrjár aðrar skútur legið bundnar saman. Það þurfti því að leysa skúturnar fyrir framan og færa til svo hægt væri að koma Inook á brott.

„Þetta er hið undarlegasta mál.“ Hefur Morgunblaðið eftir Halldóri Sveinbjörnssyni sem á eina af skútunum sem lágu nærri Inook.