Kristinn Sigurjónsson, fyrrverandi lektor í HR, hefur ráði Jón Steinar Gunnlaugsson, hæstaréttarlögmann og áður dómara við Hæstarétt, til að gæta hagsmuna sinna. Kristinn var rekinn úr HR, líkt og frægt er orðið, fyrir að segjast ekki vilja starfa með konum. Jón Steinar hefur löngum þótt umdeildur.
Eiríkur Jónsson greinir frá þessu. „Nú kemur í ljós að ég var opinber starfsmaður hjá Háskólanum í Reykjavík þar sem HR yfirtók Tækniskólann, þar sem ég kenndi áður, og fylgdu öll starfsréttindi okkar sem þar vorum við flutning yfir í HR,” hefur Eiríkur eftir Kristni. Jón Steinar er sagður hafa nú þegar sent rektor HR bréf vegna málsins.
Þann 3. október fjallaði DV um mál Kristins sem kenndi kúrsa síðastliðinn vetur í raforkukerfum og kraftrafeindatækni. Á lokuðum Facebook hóp sem nefnist karlmennskan lét hann falla ummæli um kynin á vinnustöðum:
„Ég er svo hjartanlega sammála, það á að aðgreina vinnustaði karla og kvenna. Vandinn er bara að konur reyna alltaf að troða sér þar sem karlmenn vinna, og um leið og þær eru komnar inn, þá byrja þær að eyðileggja hann, því allir kalmennirnir eiga þá að fara að tala, hugsa og hegða sér eins og kerlingar, allt annað er áreiti og ef sagður en neðanbeltisbrandari, svo ég nefni ekki klámbrandari, þá er það kynferðisofbeldi.“