Fulltrúar Norður- og Suður-Kóreu funduðu í landamærabænum Panmunjom, sem er á hlutlausasvæðinu á milli ríkjanna, í dag að staðartíma. Þetta var fyrsti fundur fulltrúa ríkjanna síðan 2015. Á fundinum náðist samkomulag um að Norður-Kórea sendi keppendur á Vetrarólympíuleikana í Pyeongchang í Suður-Kóreu í næsta mánuði.

Að fundi loknum sagði Chun Hae-Sung, formaður suður-kóresku nefndarinnar um friðsamlega sameiningu Kóreuríkjanna, að Norður-Kórea hefði lagt til að landið sendi stóra sendinefnd á Ólympíuleikjanna. Í henni yrðu keppendur, fulltrúar ólympíunefndarinnar, áhorfendur, listamenn og fréttamenn.

Sky-fréttastofan segir í umfjöllun sinni um málið að ýmislegt annað en þátttaka íþróttamanna á Ólympíuleikunum geti verið það sem drífur Kim Jong-un, leiðtoga Norður-Kóreu, áfram í að ræða við nágrannana í Suður-Kóreu. Hann sé hugsanlega að nýta sér spennu í samskiptum Suður-Kóreu og Bandaríkjanna til að reyna að reka fleyg á milli þessara bandalagsríkja.

Moon Jae-in, forseti Suður-Kóreu, hefur verið annarrar skoðunar en Donald Trump, Bandaríkjaforseti, um hvernig á að nálgast Norður-Kóreu. Jae-in hefur talað fyrir efnahagslegu samstarfi við grannríkið sem og diplómatískum samskiptum. Trump hefur verið talsmaður algjörrar einangrunar Norður-Kóreu vegna ítrekaðra tilrauna norðanmanna með kjarnorkusprengjur og eldflaugar.

Talið er að refsiaðgerðir Sameinuðu þjóðanna gegn Norður-Kóreu séu farnar að gera einræðisstjórn Kim Jong-un lífið erfitt, sérstaklega eftir að sala á eldsneyti til landsins var takmörkuð mjög mikið. Líklegt þykir að Kim Jong-un vonist til að þáttaka norðanmanna á Ólympíuleikunum dragi úr líkunum á Bandaríkin ráðist á Norður-Kóreu.

Sky segir að heimildir í Washington hermi að stjórnvöld og hernaðaryfirvöld séu nú að undirbúa það sem hefur verið talið óhugsandi fram að þessu, árás Bandaríkjahers á Norður-Kóreu. Slík árás mun að öllum líkindum hafa í för með sér að Norður-Kórea svari með árás á Suður-Kóreu en slík árás myndi líklega verða tugum þúsunda að bana þar í landi. Sumir embættismenn Donald Trump hafa gefið til kynna að það sé fórnarkostnaður sem Bandaríkin séu tilbúin til að greiða.

Það er ákveðin kaldhæðni í því að sættir á milli Kóreuríkjanna geta aukið spennuna á Kóreuskaganum því sættir gætu styggt hinn móðgunargjarna Donald Trump.