Ekkert hefur spurst til hinnar 45 ára gömlu Dorte Larsen síðan föstudaginn 29. desember síðastliðinn. Dorte, sem búsett er í Kastrup, skildi eftir miða en á honum stóð að hún ætlaði að fara út í göngutúr.
Dorte, sem er þriggja barna móðir, sagði einnig á miðanum að hún þyrfti ekki að nota bílinn næstu klukkustundirnar. Hvað gerðist síðan virðist enginn vita en Dorte sést á eftirlitsmyndavélum skammt frá heimili sínu klukkan 10.23 á föstudag.
Þegar nokkrar klukkustundir voru liðnar höfðu aðstandendur hennar samband við lögreglu sem brást skjótt við og sendi leitarhóp með sporhunda til leitar. Nú, fjórum dögum síðar, stendur leit enn yfir.
Í tilkynningu frá lögreglu kemur fram að Dorte hafi átt við andleg veikindi að stríða þó eiginmaður hennar til 25 ára, Claus Larsen, segi að ekkert hafi bent til þess að hún myndi láta sig hverfa.
Aðstandendur Dorte hafa hvatt fólk og fyrirtæki í nágrenninu um að kanna nánasta umhverfi sitt og huga að eftirlitsmyndavélum í þeirri von að finna hana.